संघीय समाजवादी फोरम नेपालका अध्यक्ष उपेन्द्र यादवले दुई नम्बर प्रदेशको चुनाव असोज २ गते गर्ने सरकारको निर्णयप्रति असन्तुष्टि व्यक्त गरेका छन् । मधेशलाई घेराबन्दीमा पार्न नेपाली काँग्रेस र नेकपा माओवादी केन्द्रले मिलेर षड्यन्त्र बनाएको र राष्ट्रिय जनता पार्टी नेपालको दिशाहीनताले त्यो योजना सफल भएको यादवले टिप्पणी गरेका छन्।
आफ्नै निवास विराटनगरमा बिहीबार संचारकर्मीसँग कुरा गर्दै फोरम नेपालका अध्यक्ष यादवले भने,– ‘काँग्रेस र माओवादी पहिलेदेखि नै चाहन्थे कि दुई नम्बर प्रदेशको निर्वाचन तेस्रो चरणमा होस् । अन्य सबै ठाउँमा निर्वाचन सम्पन्न भइसकेपछि दुई नम्बरलाई घेराबन्दी गर्न सजिलो हुने योजनाले उनीहरुले यस्तो गरेका हुन् ।’
तीन चरणमा चुनाव गर्ने सरकारी निर्णय मधेशको लागि घातक भएको भन्दै अध्यक्ष यादवले आठ जिल्लामा तेस्रो चरणमा निर्वाचन गर्ने सरकारी निर्णयले सिङ्गो मधेशको अस्तित्वमाथि ठाडो प्रहार भएको टिप्पणी गरेका छन्। ‘मेचीदेखि महाकालीसम्म बीस जिल्लाको तराई मधेशलाई आठ जिल्लामा सिमित पार्ने षड्यन्त्र भएको छ । आठ जिल्लाको भूभाग मात्रै मधेश हो भनेर मान्यता स्थापित गर्न खोजिएको छ,’ यादवले भने ।
तीन चरणको चुनाव मधेशको लागि घातक भएको भन्दै अध्यक्ष यादवले राजपाको दिशाहीनता र अपरिपक्व रवैयाले गर्दा काँग्रेस-माओवादीको योजना सफल भएको टिप्पणी गरे । उनले भने, ‘तीन चरणको चुनावले मधेशलाई नै घाटा हुन्छ। टुक्राटुक्रामा हुने चुनावले मधेशलाई नै क्षति पुग्छ।’
दिशा र गन्तव्य बिर्सेर अनिर्णीयको बन्दी बनेको टिप्पणी गर्दै अध्यक्ष यादवले राजपाले आन्दोलनको नाममा मधेशमा अराजकता मच्चाउने कार्य गरेकोले आठ जिल्लालाई छुट्टयाएर तीन चरणमा चुनाव गर्ने काँग्रेस-माओवादीको योजना सफल भएको बताए । राजपाको दिशाहीन राजनीतिले गर्दा काँग्रेस-माओवादीले मधेशको सिङ्गो अस्तित्वमाथि प्रहार गर्ने मौका पाएको उनले बताए।
‘पहाडमा एमालेसँग पराजय भोगेका काँग्रेस-माओवादीलाई पहिलेदेखि नै थाहा थियो मधेशमा पनि पराजय निश्चित,’ यादवले भने,‘त्यही डरले उनीहरुले आठ जिल्लाको निर्वाचन स्थगित गरेका हुन्।’
