विगत ६ वर्षदेखि भिजेका रूपमा सुपरिचित सन्ध्या केसी अहिले इमेज च्यानलमा व्यस्त छिन् । कल लाइभ, एसएमएस, इम्याक्स तथा पार्टी सेन्टर शीर्षकका कार्यक्रम चलाउने सन्ध्या बाहिरका कार्यक्रमहरू पनि संचालन गर्छिन् । केही विज्ञापन तथा म्युजिक भिडियोमा समेत अभिनय गरेकी सन्ध्या पछिल्लो समय फिल्ममा पनि उतिक्कै व्यस्त छिन् ।
उनको डेब्यू फिल्म हो अनमोल केसी स्टारर ‘ड्रिम्स’ । तर, यो फिल्ममा छोटो भूमिकाका कारण उनी दर्शकहरुको आँखामा पर्न सकिनन् । ‘ड्रिम्स’ बाट भित्रिएकी नायिका साम्राज्ञी राज्यलक्ष्मी शाहलाई यही फिल्मले स्टार बनायो तर सन्ध्याका लागि भने यो फिल्म डेब्यू पनि बनेन । नेपालमा धेरै कलाकारहरु यस्ता छन् जो छोटो भूमिका भएपनि फिल्म हिट भयो भने त्यसलाई आफ्नो डेब्यू फिल्म मान्छन् तर सन्ध्या भने ‘ड्रिम्स’ लाई डेब्यू फिल्म मान्दिनन् ।
यति सम्मकी पत्रकारले उनलाई ‘ड्रिम्स तपाई अभिनित फिल्म हो ?’ भनेर प्रश्न तेर्साउँदा समेत उनी कुरा मोड्छिन् । उनी आफ्नो डेब्यू फिल्म ‘कमलेको बिहे’ लाई मान्छिन्, किनकी उनको यो फिल्ममा मुख्य भूमिका छ । नायक अनुप विक्रम शाहीको अपोजिटमा देखिएकी सन्ध्या अब दर्शकहरुले यही फिल्मबाट नायिकाको ट्याग दिनेमा विश्वस्त छिन् । कान्तिपुर पब्लिकेसन्सको एम एण्ड एसमा उनलाई ऐश्वर्या रायसँग समेत तुलना गरिएको थियो ।