काठमाडौं । सरकारले नेटवर्किङ व्यवसायलाई बैधता दिएपनि पिरामिड शैलीमा यस्तो व्यवसाय गर्न नपाउने व्यवस्था गर्ने भएको छ ।
सदस्य संख्या बढाउँदै पिरामिड आकारमा सञ्जाल विस्तार गरी बस्तु तथा सेवा बिक्री गर्ने व्यवसायीले ठगी गरेपछि सरकारले कानुन बनाएरै यस्तो व्यवसायमा प्रतिबन्ध लगाएको हो । वाणिज्य मन्त्रालयले तयार गरेको बस्तु तथा सेवा प्रत्यक्ष बिक्री ऐनमा यस्तो व्यवस्था गरिएको अाजकाे काराेबार दैनिकमा समाचार छ ।
सर्वोच्च अदालतले ६ वर्षअघि नै नेटवर्किङ व्यवसायसम्बन्धी कानुन बनाउन सरकारलाई आदेश दिएको थियो । संविधानबमोजिम कुनै पेसा व्यवसाय गर्न रोक्न नमिल्ने भएकाले नेटवर्किङ व्यवसायलाई भने बैधता दिइने भएको छ ।
सोही बमोजिम नेटवर्किङको ठगी रोक्न तथा नियमन गर्न ऐन तयार पारिएको वाणिज्य मन्त्रालयले जनाएको छ । वाणिज्य मन्त्रालयका कानुन उपसचिव श्रीरामजी दर्नाइका अनुसार नयाँ कानुनले नेटवर्किङ व्यवसाय गर्न पाइने व्यवस्था गरेको छ ।
युनिटी लाइफ इन्टरनेश्नल, हर्वो इन्टरनेशनल, गोलक्वेस्ट, क्रिस्टल भिजन लिमिटेडलगायतले पिरामिड आकारको व्यवसाय सञ्चालन गरी नेपालीलाई ठगी गरेपछि सरकारले प्रतिबन्ध लगाएइको थियो । युनिटी लाइफ र हर्बो इन्टरनेसनलका सञ्चालकलाई पक्राउ गरी कारबाही भइसकेको छ ।
व्यवसायीले अप्रमाणीत विज्ञापन गर्न नपाइनुका साथै हरेक बस्तुको अधिकतम खुद्रा मूल्य राख्नुपर्ने व्यवस्था ऐनको मस्यौदामा गरिएको छ । त्यस्तै बजारमा कार्टेलिङ, सिन्डिकेट गर्नेको संस्था खारेज गरी जेलसजाय र जरिवाना दुवैको व्यवस्था गरिएको छ ।
