दाङ। माइक्रो बस दुर्घटना हुँदा तीनजना घाइते भएका छन् । तुलसीपुरबाट नेपालगन्जतर्फ जाँदै गरेको बा२ख १३४७ नम्बरको माइक्रो बस आज बिहान पूर्व–पश्चिम राजमार्गको अमेलियानजिक दुर्घटनामा परेको हो ।
इलाका प्रहरी कार्यालय तुलसीपुरका अनुसार उक्त दुर्घटनामा परी तुलसीपुर–६ निवासी ४० वर्षीय आशिष डाँगी र तुलसीपुर–९ का ३६ वर्षीय धना पौडेल र ९ वर्षीय संरचना पौडेल घाइते भएका छन् । घाइतेहरुको हातखुट्टा र टाउकोमा चोट लागेको प्रहरीले बताएको छ ।
घाइते तीनैजनालाई उपचारका लागि बाँकेको कोहलपुरतर्फ लगिएको छ । माइक्रोको ‘ब्रेक फेल’ भएका कारण उक्त दुर्घटना भएको थियो । प्रहरीका अनुसार ब्रेक फेल भएपछि चालकले गाडीलाई भित्तामा ठोकेर ठूलो दुर्घटना हुनबाट जोगाएका थिए ।
