विराटनगर। पेट्रोल ढुवानी चालक सङ्घले मजदुरको रिहाइको माग गर्दै चार दिनदेखि विराटनगरबाट इन्धनको ढुवानी ठप्प पारेको छ ।
इन्धनको कालोबजारीको अभियोगमा एक साताअघि विराटनगरबाट पक्राउमा परेका ट्याङ्करका चालक र सहचालकको रिहाइको माग राखी सङ्घको आह्वानमा इन्धन ढुवानी ठप्प भएको हो ।
भारतको बरौनीबाट इन्धन बोकेर आएका ट्याङ्करले विराटनगरस्थित नेपाल आयल निगमको क्षेत्रीय कार्यालयको डिपोमा इन्धन झार्न र डिपोबाट इन्धन भर्ने काम ठप्प पारेका हुन् ।
क्षेत्रीय कार्यालयको डिपोबाट सगरमाथा र कोसी अञ्चलका १२ जिल्लामा इन्धन आपूर्ति हुने गरेकामा चार दिनदेखि सो आपूर्ति हुन नसक्दा इन्धनको अभाव देखिन थालेको निगम क्षेत्रीय कार्यालयले जनाएको छ ।
सङ्घका पदाधिकारीसँग प्रजिअ तोयम रायको उपस्थितिमा पटकपटक वार्ता भएपनि अहिलेसम्म ठोस निष्कर्ष नआएको आयल निगमका क्षेत्रीय प्रमुख भुवन रेग्मीले बताए ।
ती १२ जिल्लामा दैनिक ६०० किलोलिटर इन्धन खपत हुने गरेको छ ।
