भक्तपुर । परीक्षा नियन्त्रण कार्यालय भक्तपुरले यस वर्षको प्रवेशिका अर्थात एसएलसी परीक्षा आगामी चैत १८ गतेदेखि २९ गतेसम्म सञ्चालन गर्ने भएको छ ।
परीक्षा नियन्त्रक खगेन्द्र नेपालका अनुसार चैत १८ गते अङ्ग्रेजी, चैत १९ गते नेपाली, २१ गते गणित, २२ गते विज्ञान, २३ गते सामाजिक, २४ गते स्वास्थ्य तथा जनसङ्ख्या, २५ गते ऐच्छिक प्रथम, २६ गते ऐच्छिक द्वितीय, चैत २७, २८ र २९ गते प्राविधिक तर्फका बाँकी विषयको परीक्षा हुनेछ ।
आज बसेको माध्यमिक शिक्षा उत्तीर्ण परीक्षा समितिको बैठकको निर्णयानुसार परीक्षा तालिका सार्वजनिक गरिएको हो ।
गत वर्ष चैत ५ गतेदेखि १६ गतेसम्म सञ्चालन भएको परीक्षा यस वर्ष भने तराई आन्दोलनका कारण १३ दिन ढिलो सुरु हुने भएको हो ।
यस वर्षको एसएलसी परीक्षाको नतिजा लेटर ग्रेडिङ्मा सार्वजनिक गरिने भए पनि परीक्षा सञ्चालनको विधि भने विगतका वर्षहरुमा जस्तै हुने परीक्षा नियन्त्रक नेपालले जानकारी दिए । रासस
