एजेन्सी । अष्ट्रियामा जारी रहेको विश्वसुन्दरी ‘मिस अर्थ’ प्रतियोगितामा भारतीय प्रतिस्पर्धीले अनौठो छलछाम गरेकी छिन् । उनले आफ्नो परिचयात्मक भिडियोमा भारतको सुन्दरताको खुब गुणगान गाइन्, तर देखाइन् नेपालका दृश्य ।
नेपालका हिमाल, पहाड र नदीनालाका सुन्दरतम दृश्यहरु देखाउँदै भारतीय सुन्दरी आइताल खोस्ला भन्छिन्, ‘भारतको प्राकृतिक दृश्यबाट कोही पनि चकित नपर्न असम्भव छ । प्रकृति आफैंले दिएको पहाड, जंगल र नदीनालासहितको यस्तो अद्भूत दृश्यवाली पृथ्वीमा अन्यत्र कहीँ पनि छैन ।’
यो भिडियो दुई मिनेट १४ सेकेन्ड लामो छ । भिडियोमा देखाएका दृश्यहरु टेटोन ग्य्राभिटी रिसर्चका एरियल सिनेमा एक्सपर्टहरुले हेलिकोप्टरबाट खिचेका थिए । यो भिडियो करिब नौ महिनाअघि एउटा भिडियो च्यानलमा सार्वजनिक गरिएको थियो ।
मिस अर्थको अफिसियल च्यानलमा अपलोड गरिएको भिडियोमा सगरमाथा, अमा दब्लम र ल्होत्सेका दृश्यहरु समावेश गरिएको छ । यतिमात्रै कहाँ हो र, काठमाडौंको एउटा व्यस्त सडकको दृश्य पनि यसमा समावेश छ, जहाँ नेपाली नम्बर प्लेटका गाडी, नेपाली साइनबोर्ड र ट्राफिक प्रहरी देखिन्छन् ।
