सिन्धुपाल्चोक : नेपालले चीनसँग व्यापार गर्ने सबैभन्दा ठूलो तातोपानी नाकाबाट व्यापारिक कारोबार सुचारु गराउन बेइजिङबाट निर्देशन नआउँदा सीमाका चिनियाँ अधिकारी अन्योलमा परेका छन् ।
नेपाल–चीन सीमासुरक्षा वैठकमा सहभागी चिनियाँ अधिकारीले नाका खोल्नेबारे अनभिज्ञता प्रकट गरेका हुन् ।
बुधबार सिमाको न्यालाम काउन्टीमा भएको सिमा क्षेत्रका सरकारी अधिकारीहरुको वैठकमा न्यालामका सिडिओ दु बिङले बेइजिङबाट निर्देशन नआएसम्म तातोपानी नाका खुल्ने मितिबारे केही भन्न नसकिने प्रतिक्रिया दिएको बैठकमा सहभागी नेपाली अधिकारीले बताए ।
सीमा वैठकमा प्रमुख जिल्ला अधिकारी बलभद्र गिरी नेतृत्वको नेपाली टोलीले तातोपानी नाका छिटो सञ्चालनमा ल्याउन आग्रह गरेका थिए ।
चीन सरकारले सिगात्से–खासा सडक सञ्चालनमा ल्याउन सकिने नसकिनेगरेको सर्भे प्रतिवेदनपछि मात्रै नाका सञ्चालन गर्ने विषमा थाहा हुने चिनियाँ अधिकारीले बताएको प्रजिअ गिरीले जानकारी दिए ।
गिरीका अनुसार जतिसक्दो छिटो नाका सञ्चालनमा ल्याउन पहल गर्ने चिनियाँ अधिकारीले प्रतिवद्धता व्यक्त गरेका छन् ।
व्यापारिक कारोबारका लागि सर्भेको प्रतिवेदन कुरेपनि इन्धन ल्याउन भने नाका सञ्चालनमा ल्याउन सक्ने संकेत चिनिया अधिकारीले दिएको वैठकमा सहभागी प्रहरी नायव उपरीक्षक विश्व अधिकारीे बताए ।
अधिकारीका अनुसार चीन सरकारले इन्धन आपूर्तिमा प्राथमिकता दिने अधिकारीहरुले बैठकमा जानकारी गराएका थिए ।
नेपाली टोलीले भारतले गरेको नाकावन्दीका कारण जनजीवन कष्टकर बनेकाले नाका छिटो सञ्चालनमा ल्याएर आपूर्ति सहज बनाउन सहयोग गर्न बैठकमा आग्रह गरेको थियो ।
चिनियाँ टोलीले खासामा भएका सरकारी भवन पुनर्निर्माणमा समय लाग्ने भएकाले सडक सर्भेको प्रतिवेदनपछि न्यालाममै भन्सार सञ्चालन गरेर व्यापारिक कारोबार सुरु गर्ने जानकारी दिएको वैठकमा सहभागी एक अधिकारीले बताए ।
खासामा भूकम्पले क्षति पु¥याएपछि सुरक्षाकर्मीबाहेकका सरकारी कर्मचारी, व्यवसायी र सर्वसाधारणलाई चीन सरकारले सिगात्सेमा स्थानान्तरण गरेको थियो ।
नेपालतर्फका भन्सार, अध्यागमन लगायत कार्यालय साविककै ठाउँमा सञ्चालनमा ल्याइसकेपनि चिन सरकारले अझै लिपिङ र खासामा भएका भन्सार लगायत सरकारी कार्यालय सञ्चालनमा नल्याउँदा आयात निर्यात प्रभावित भएको छ ।
पूर्णरुपमा व्यवसाय सञ्चालनमा ल्याउन केही समय कुर्नुपर्ने देखिएपनि भुकम्प अघि खासाका गोदाममा रहेका नेपाली व्यवसायीको पाँच सय कन्टेनर भन्दा बढी चिनियाँ सामाग्री नेपाल ल्याउने विषयमा भने प्रकृया पूरा हुन लागेकाले छिटै छाड्ने चिनिया टोलीले जनाएको वैठकका सहभागीले बताए ।
सहभागीका अनुसार न्यालामबाट स्थानीय प्रशासनमार्फत नाका सञ्चालनको पहल भएपनि चीन सरकारले स्वीकृति नदिएकाले तातोपानी नाका सञ्चालनमा आउन सकेको छैन ।
नाका सञ्चालन बाहेक सिमा सुरक्षा, तस्करी नियन्त्रण लगायत कार्यमा सहकार्य गर्ने सहमति भएको वैठकका सहभागीले बताए । बैठकमा न्यालामका सिडिओ बिङको नेतृत्वमा न्यालाम पोर्टका कार्यकारी निर्देशक लगायत १९ जना सहभागी थिए ।
नेपालका तर्फबाट प्रजिअ गिरी नेतृत्वमा सुरक्षा निकायका प्रमुख, भन्सार, अध्यागमन, नापी तथा वन कार्यालय लगायत निकायका प्रमुख सहभागी थिए ।
