काठमाडौं। मुलुकमा इन्धनको चरम अभाव भएको बेला उत्तरी छिमेकी चीनले नेपालको अनुरोध अनुसार आफू सबै किसिमको सहयोग गर्न तयार रहेको बताएको छ।
चिनियाँ विदेश मन्त्रालयकी प्रवक्ता हुआ चुनयिङले आफ्नो नियमित पत्रकार सम्मेलनमा बिहिबार वैशाख १२गतेको भूकम्पले बन्द भएको जिलुङ (केरुङ) नाका भर्खरै खुलेको र नेपालले अनुरोध गरे चीन सबै कुरा सहयोग तयार रहेको बताइन्। प्रश्नमा इन्धन पनि पठाउन सकिने बारे सोधिएपनि उनले इन्धन उल्लेख नगरी नेपाल सरकारको अनुरोधमा सबै  किसिमको सहयोग गर्न चीन तयार रहेको बताइन्।
मधेसवादी दलको अवरोध र भारतको अघोषित नाकाबन्दीका कारण भारतसँग जोडिएका नाकाबाट इन्धन आपूर्ति हुन नसक्दा देशभरि इन्धन अभाव भइरहेको छ।