काठमाडौं। प्रशान्त तामाङको शीर्ष भूमिका रहेको चलचित्र ‘परदेशी’ को गीत एक कार्यक्रमबीच सार्वजनिक भएको छ। चलचित्रका तीन गीतको भिडियो प्रदर्शन गरिएको कार्यक्रममा प्रशान्तले चलचित्रको कथा पारिवारिक तथा मौलिक भएको बताए।
राजधानीमा आयोजित कार्यक्रममा कलाकार मदनकृष्ण श्रेष्ठ तथा हरिवंश आचार्यलगायतले चलचित्रको अडियो सीडी सार्वजनिक गरेका हुन्। कलाकार हरिवंश आचार्यले नाकाबन्दीमा हिन्दी फिल्म नचल्नाले नेपाली कलाकारकै कलाले प्राथमिकता पाएको बताए।
चलचित्रका निर्देशक नारायण रायमाझीले चलचित्रमा स्वदेशमा अवसर नपाएर परदेसिएका युवाको यथार्थ कथा भएको जानकारी दिए।चलचित्रमा प्रशान्तको साथमा रजनी केसी, नरेन खड्का, केशव भट्टराई, तारा शर्मालगायतको अभिनय छ। चलचित्र आगामी फूलपातीदेखि प्रदर्शन हुँदैछ।