भारतले रक्सौल भन्सारमा रोकेका तेल ट्यांकरलाई नेपाल प्रवेशको अनुमति दिइएको छ ।
संविधानलाई लिएर असन्तुष्ट देखिएको भारतले आपूर्ति व्यवस्था रोकिन सक्ने आशयको विज्ञप्ति जारी गरेको भोलिपल्ट सीमामा नेपाली ट्यांकर रोकिएको थियो ।
तर, नियमित चेकजाँचमा भन्दा निकै कडाइ गर्दै भारतले ट्यांकरहरुलाई नेपाल आउन दिएको थिएन । ‘अरु बेला गाडी नम्बरमात्र लेखाउँथ्यो । तर, आज अनेक कागज पत्र माग गरिएको थियो’ स्रोतले भन्यो ।
सीमामा नेपाली ट्यांकर रोकिएपछि भारतले चर्को विरोध भयो । सामाजिक सञ्जाल ट्वीटरमा #BackOffIndia विश्वभर तेस्रो नम्बरमा ट्रेण्डिङ समेत भएको छ ।
चर्को विरोध र सरकारी स्तरबाट भएको समन्वयपछि अपराहृन ट्यांकरहरू छुटेका छन् ।
वीरगञ्ज भन्सारका प्रमुख मित्रलाल रेग्मीले रोकिएका सबै ट्यांकर छुटेको अनलाइनखबरलाई जानकारी दिए । उनले भने-‘निगमका अधिकारीहरु गएर कागजपत्र बुझाएलगत्तै सबै ट्यांकर नेपाल प्रवेश गरेका छन् ।’
बिहान भारतीय भन्सारका अधिकारीले माथिको निर्देशन भन्दै ट्यांकरलाई भन्सारबाट छुटाउन नमानेका नेपाल आयल निगमले जनाएको थियो ।
