भक्तपुर: नेपाल मजदुर किसान पार्टीका अध्यक्ष नारायणमान बिजुक्छेले संविधानसभाबाट जारी भएको संविधान नमान्नेलाई राजावादीको संज्ञा दिएका छन्। संविधानबारे पार्टीको दृष्टिकोण सार्वजनिक गर्न सोमबार भक्तपुरको दत्तात्रयमा आयोजित जनसभामा बिजुक्छेले सामन्ती राजतन्त्र फालेर आएको लोकतान्त्रिक गणतन्त्र तथा समाजवाद उन्मुख संविधान नस्वीकार्नु परिवर्तनविरोधी र राजतन्त्रको पक्षपाती हुने बताए।
‘यो संविधान समाजवाद उन्मुख भनिए पनि पूर्ण समाजवादी होइन’, उनले भने, ‘त्यसैले बहुमत जनताको गाँस, बास र कपासको सुनिश्चितताका लागि थप आन्दोलन गर्नैपर्छ, हाम्रो संघर्ष जारी छ।’ संविधान जारी हुन नदिने भारतीय एकाधिकार र विस्तारवादी नीतिले धेरै प्रयास गरे पनि असफल भएको उनको भनाइ थियो।
बिजुक्छेले संविधानविरुद्ध मधेसमा भएको आन्दोलन भारतकै जानकारीमा भएको आरोप पनि लगाए। ‘भारतकै जानकारीमा तराईमधेसमा आन्दोलन भएको हो’, उनले भने, ‘मधेसी दलका नेताहरु भारतबाट प्रयोग भएकै हुन्।’
भारत सरकारले संविधान जारी नगर्न नेपालका राष्ट्रपति र प्रधानमन्त्रीलाई समेत धम्काएको दाबी गर्दै बिजुक्छेले भारतीय शासकहरूमा अहिलेसम्म ब्रिटिस इस्ट इन्डिया कम्पनीको विस्तारवादी र साम्राज्यवादी मनोवृत्ति बाँकी नै भएको बताए।
 ‘संविधान जारी गर्न नदिन हाम्रा राष्ट्रपति र प्रधानमन्त्रीलाई धम्काउनु भारतीय शासकहरूमा बाँकी भएको ब्रिटिस इस्ट इन्डिया कम्पनीको विस्तारवादी र साम्राज्यवादी मनोवृत्तिको उपज हो’, उनले भने।