काठमाडौं । एएफसी अण्डर सिक्सटिन च्याम्पियनसिप फुटबल छनोट चरणको दोस्रो खेलमा आज नेपालले आयोजक कीर्गिस्तानसँग खेल्नेछ ।
कीर्गिस्तानको बिस्केकमा जारी प्रतियोगिताको पहिलो खेलमा जोर्डनलाई हराएको नेपाल आज दोस्रो खेलमा आयोजकलाई स्तब्ध पार्ने दाउमा छ ।
पहिलो खेलमा शक्तिशाली प्रतिद्वन्द्वी जोर्डनलाई हराएपछि उमेर समुहको यो प्रतियोगितामा नेपाललाई पनि दावेदारको रुपमा हेर्न थालिएको छ ।
छनौट चरणको समुह बी मा रहेको नेपालले कीर्गिस्तानपछि यही असोज ३ गते ओमानसँग खेल्ने तालिका छ । भारतमा हुने फाईनल चरणका लागि एसियाका ४५ राष्ट्रलाई ११ समुहमा विभाजन गरी छनोट चरण खेलाईदैछ ।
प्रत्येक समुहका विजेता, चार उत्कृष्ट उपविजेता तथा आयोजक भारत समेत गरी कुल १६ टोलीले एएफसी युथ सिक्सटीन च्याम्पियनसिप फुटबलको अन्तिम चरण खेल्नेछन् ।
