यसपालि शरदमा सगरमाथा शिखर जाने पहिलो आरोहीको अनुमति जापानका नोबुकाजु कुरिकीले पाएका छन् । संस्कृति, पर्यटन तथा नागरिक उड्डयन मन्त्रालयले आइतबार आयोजना गरेको कार्यक्रममा मन्त्री कृपासुर शेर्पाले कुरिकीलाई सगरमाथा आरोहण अनुमतिपत्र प्रदान गरे ।
‘विनाशकारी भूकम्पपछि शरद ऋतुमा सगरमाथा आरोहणका लागि अनुमति जारी गर्न पाउँदा हामी खुसी छौं,’ पर्यटन मन्त्री शेर्पाले भने, ‘भूकम्पबाट पर्यटन क्षेत्रमा परेको प्रभाव र त्यसबाट विश्वबजारमा गएको नकारात्मक सन्देश चीर्न सगरमाथा आरोहणले उल्लेख्य मद्दत गर्ने विश्वास छ ।’
कुरिकी मंगलबार हेलिकोप्टरबाट सगरमाथा जानेछन् भने भदौ अन्तिमतिर शिखर पुग्ने लक्ष्य लिएका छन् । ‘मेरो आरोहणको मुख्य उद्देश्य भनेको भूकम्पपछि पनि पर्वतारोही र पदयात्रीका लागि नेपाल सुरक्षित छ भन्ने सन्देश संसारभर फैलाउनु हो,’ आरोहण अनुमतिपत्र लिएपछि ३३ वर्षीय कुरिकीले भने, ‘यसमा सफल हुन्छु भन्ने बलियो आत्मविश्वास छ ।’
