काठमाडौं ३ श्रावण । प्रधानमन्त्री एवम् नेपाली काँग्रेसका सभापति सुशील कोइरालाले संविधान निर्माणको प्रक्रियाको विरोध गरिरहेका र संविधानसभाबाहिर रहेका सबै दललाई सहमतिमा ल्याएर संविधान जारी गरिने बताएका छन्।
नेपाल इन्जिनियर्स एसोसिएसनले ५३औँ इन्जिनियर्स दिवसका अवसरमा आज यहाँ आयोजना गरेको कार्यक्रममा प्रधानमन्त्री कोइरालाले अब बन्ने संविधानमा सबैका हकअधिकार सुनिश्चित हुने भएकाले सबै दल सहमतिमा आउने विश्वास व्यक्त गरे।
मुलुकमा लामो समयदेखि राजनीतिक अस्थिरता र अशान्ति भएकाले विकास अवरुद्ध हुन पुगेको स्मरण गर्दै प्रधानमन्त्री कोइरालाले भने, “अहिले सबै दलका नेतामा देशप्रति चिन्ता छ, तसर्थ अब मुलुकले छिट्टै निकास पाउनेछ ।”
भूकम्पपछिको पुनः निर्माण र नवनिर्माणमा इन्जिनियर तथा अन्य प्राविधिक जनशक्तिको ठूलो महत्व हुने बताउँदै उहाँले लामो समयदेखि मुलुकमा रहेको सङ्क्रमणको अन्त्य गरी सबैलाई विकास निर्माणतर्फ ध्यान केन्द्रित गर्न आग्रह गरे।
कार्यक्रममा भौतिक पूर्वाधार तथा यातायात व्यवस्था मन्त्री बिमलेन्द्र निधिले भूकम्पलगत्तै इन्जिनियरले सर्वसाधारणका घर–घरमा पुगेर प्रारम्भिक जाँच गरी बस्न मिल्ने /नमिल्ने जानकारी दिएर ठूलो गुन लगाएको बताए।
मन्त्री निधिले प्रदेशको सीमाङ्कन गरेर मात्र संविधान जारी हुनुपर्ने धारणा राख्दै संविधानको मस्यौदामा विद्यमान नागरिकतासम्बन्धी प्रावधान पक्षपाती भएको उल्लेख गरे।
ऊर्जामन्त्री राधा ज्ञवालीले भूकम्पपछिको पुनः निर्माणमा इन्जिनियरको ठूलो आवश्यकता र महत्व रहने बताउनुहँुदै मुलुकको भविष्य पनि इन्जिनियरकै हातमा रहेको बताए।
वर्तमान सरकारले ऊर्जा र जलविद्युत्का क्षेत्रमा उल्लेख्य काम गरेको जानकारी गराउनुहँुदै मन्त्री ज्ञवालीले सरकारको प्रतिबद्धताअनुसार तीन वर्षमा विद्युत्भार कटौती अन्त्य हुने विश्वास दिलाए।
राष्ट्रिय योजना आयोगका उपाध्यक्ष डा गोविन्द पोखरेलले मुलुकको विकास दु्रत गतिमा अघि बढेका बेला अकल्पनीय रुपमा आएको भूकम्पले विकास लागत बढ्ने जानकारी दिदै यसमा इन्जिनियरको ज्ञान र नयाँ प्रविधिको आवश्यकता पर्ने बताए।
कार्यक्रममा एसोसिएसनका अध्यक्ष ई. ध्रुवराज थापा, उपाध्यक्ष ई. अरविन्दकुमार गुप्ता, महासचिव ई. किशोरकुमार झा, निवर्तमान अध्यक्ष ई. महेन्द्रबहादुर गुरुङले मुलुकमा विज्ञान र प्रविधिले उचित महत्व नपाएकाले सोचेअनुसारको विकास नभएको भन्दै मुलुकको निर्माण र नवनिर्माणमा सरकारले अवसर दिए पछि नहट्ने विचार व्यक्त गरे।
एसोसिएसनको पहलमा वैशाख १२ गतेको भूकम्पलगत्तै करिब तीन हजार ५०० इन्जिनियरले स्वम्सेवी रुपमा भूकम्पबाट क्षति भएका ६५ हजार घरको प्रारम्भिक जाँच गरी बस्न मिल्ने/नमिल्ने जानकारी दिएका थिए ।
भूकम्प प्रभावित क्षेत्रमा पुनः निर्माण कार्यमा सघाउन पनि एसोसिएसनले ‘बिल्ड बेटर नेपाल’ नाराका साथ विभिन्न योजना अघि सारेको छ । रासस