बजेटले ल्याएका नयाँ नारा यस्ता छन्

काठमाडौं असार २९ । यसपालिको बजेटम केही नयाँ नारा अघि सारिएको छ।

बजेटमा‘हाम्रो धरोहर : हाम्रै दायित्व’,‘विकासको लहर : सुविधासम्पन्न सहर’जस्ता केही मौलिक नारा र कार्यक्रम प्रस्तुत गरिएका छन्।

बजेटले ‘हाम्रो धरोहरः हाम्रै दायित्व’ अन्तर्गत भूकम्पबाट क्षतिग्रस्त सार्वजनिक सम्पदा र मठ मन्दिरको पुरानै स्वरुपका नेपालीले पुनःनिर्माण गर्ने जनाएको छ । सोका लागि बजेटमा अलग्गै सम्पदा कोष प्रस्ताव गरिएको छ ।आगामी वर्षलाई ‘सांस्कृतिक संरक्षण प्रवद्र्धन वर्ष’को रुपमा मनाउने घोषणा गरिएको छ। बजेटमा ‘एक गाउँ : एक डाक्टर’ कार्यक्रम पनि समावेश गरिएको छ।

‘विकासको लहरः सुविधासम्पन्न सहर’ कार्यक्रममा पोखरा र ललितपुरमा विकसित र सुविधासम्पन्न सहर बनाइने बजेटको लक्ष्य छ भने विराटनगरलगायतलाई स्मार्ट सिटी गुरुयोजनामा समावेश गरिने भएको छ ।

सरकारले आगामी वर्षका लागि आठ खर्ब १९ अर्ब ४६ करोडको बजेट प्रस्तुत गरेको छ। मंगलबार अपरान्ह संसद्‍मा अर्थमन्त्री डा. रामशरण महतले बजेट प्रस्तुत गरेका हुन्। यसपालीको बजेटमा भूकम्पपछिको पुनर्निर्माण र सामाजिक सुरक्षाका कार्यक्रमलाई विशेष प्राथमिकता दिइएको छ। वृद्धभत्तालाई दोब्बर बनाएर एक हजार बनाइएको छ।

बजेटले स्थानीय निकायको निर्वाचनलाई प्राथमिकता दिइएको छ। बजेटको स्रोतको ठूलो हिस्सा विदेशी सहायता र विदेशी ऋणमा निर्भर देखिन्छ। सरकारले एक खर्ब १० अर्ब रुपैंया विदेशी सहायता र ९५ अर्ब विदेशी ऋणबाट स्रोत जुटाउने लक्ष्य बजेटमा राखेको छ। सरकारी स्रोत मार्फत ६ खर्ब १४ अर्ब रुपैंया संकलन गर्ने लक्ष्य बजेटमा समावेश छ।

अर्थमन्त्री डा. रामशरण महतले विनाशकारी भूकम्पले अर्थतन्त्रमा अनपेक्षित रुपमा चुनौती थपिएको उल्लेख गर्दै नवनिर्माणमा जुट्नुपर्ने आवश्यकतामाथि जोड दिएका थिए।