पछिल्लो केही दिनमा तेलको लोडिङ बढाएको भारतीय आयल कर्पोरेसन (आईओसी)ले फेरि कटौती गरेको छ । आईओसीले आफ्ना डिपोहरुमा पुगेको १० प्रतिशत नेपाली ट्यांकरमा मात्रै लोड दिएको निगमका प्रवक्ता दीपक बरालले अनलाइनखबरलाई बताए ।
शनिबार निगमका अधिकारीलाई टेलिफोन गरी आईओसीले सामान्य अवस्थाको भन्दा बढी तेल दिने भन्दै ट्यांकर पठाउन भनेको थियो । आइतबार नेपाललाई दिँदै आएको तेलको कोटा बढाएको आईओसीले मंगलबार त्यहाँ पुगेका मध्ये ६० प्रतिशत ट्यांकरमा तेल भरेको थियो ।
तर, बुधबार फेरि एकाएक तेल कटौती गर्न थालेको छ । झण्डै डेढ सय नेपाली ट्यांकर आईओसीको डीपोमा पुगेको थिए । तर, त्यसको १० प्रतिशतलाई मात्र तेल दिने बताएको छ ।
‘आईअोसीले फेरि धोका दिएको छ’ निगमका एक अधिकारीले अनलाइनखबरसँग भने-‘आईओसीले हिजो ६० प्रतिशतसम्म ट्यांकरलाई लोड दिएको थियो । तर, आज १० प्रतिशतमा झारेको छ ।’
तेल भर्नका लागि बुधबार भारतको सिलगुढी, बरौनी, बैतालपुर, गोन्डा र वनथराको आईओसी डिपोमा ट्यकंर पुगेका थिए । तर, आईओसीले फेरि तेल न्युन परिमाणमा दिन सुरु गरेको छ ।
असोज ५ गते भारतले नेपालमा अघोषित नाकाबन्दी गरेपछि आईओसीले केही दिन पूर्णरुपमा तेल रोेकेको थियो । तर, चौतर्फी दबावपछि १० प्रतिशत मात्र तेल दिन थालेको आईओसी नेपालमा नयाँ सरकार बने लगतै केही लचिलो रुपमा प्रस्तुत भएको थियो ।
आईओसीले तेल नदिने र निकै कम दिएको बेला पनि भन्सार नाकाहरुमा अवरोध गर्दा नेपालमा झण्डै एक महिनादेखि इन्धनको चरम संकट भएको छ ।
इन्धन अभावका कारण सार्वजनिक सवारी निकै कम चलेका छन्, जसले आम सर्वसाधारणले निकै सास्ती खेप्नु परेको छ ।
