काठमाडौं । विश्वकै होचा व्यक्तिका रूपमा गिनिज बुक अफ वल्र्ड रेकर्ड्समा नाम लेखाएका चन्द्रबहादुर डाँगी अमेरिकन सामोआमा गम्भीर बिमारी परेका छन् । भतिजा दोलखबहादुर डाँगीसँग म्याजिक सर्कस अफ सामोआमा विगत ३ महिनादेखि कार्यरत डाँगी सर्कस अन्यत्र सर्ने क्रममा सिकिस्त बिमारी परेका हुन् । म्याजिक सर्कस अफ सामोआ अमेरिकाको मातहतमा रहेको द्विप अमेरिकन सामोआमा सर्ने क्रममा डाँगी बिमारी परेको बताइएको छ । अमेरिकन सामोआमा कार्यरत नेपाली चिकित्सक डा. लव चौरासियाका अनुसार डाँगीको पुरानो निमोनिया बिग्रेको कारण उनलाई सघन उपचार कक्षमा राखेर उपचार भइरहेको छ ।