जेठ १०, काठमाडौं ।
प्रधानमन्त्री सुशील कोईरालाले राष्ट्रिय सरकार गठन गर्न आफू तयार रहेको बताउनुभएको छ । बालुवाटारस्थित प्रधानमन्त्री निवासमा संविधानसभामा प्रतिनिधित्व नगर्ने ३३ दलको ज्ञापनपत्र वुझ्दै कोईरालाले मुलुक विपत्तिमा परेका बेला सबै नेपालीको भावनालाई समेटेर राष्ट्रिय सरकार गठन गर्न तयार रहेको बताउनुभएको हो ।

उहाँले प्राकृतिक विपद्ले जनधनको ठूलो नोक्सान भएपनि सबै नेपाली एकताबद्ध भए विकासको नयाँ युगमा प्रवेश गर्न सकिने बताउनुभयो ।

विकासको आधार गुमिनसकेको भन्दै उहाँले शान्ति र स्थायित्व मात्र दिनसके मुलुकमा लगानी गर्न भारत, चीन  लगायतका धेरै मित्रराष्ट्र तयार रहेको उल्लेख गर्नुभयो  । संविधानसभामा प्रतिनिधित्व नगर्ने विभिन्न ३३ दलले राष्ट्रिय सरकार गठन लगायतका माग गर्दै संयुक्त रुपमा ज्ञापन पत्र वुझाएका हुन ।